شاہ فیصل ایوارڈ 2026کے لئے نامزدگیوں کی وصولی شروع

ریاض (آئی پاک نیوز)
شاہ فیصل ایوارڈ کے جنرل سیکرٹریٹ نے پانچ شعبوں میں 2026 کے ایوارڈ کےلیے نامزدگیاں وصول کرنے کا اعلان کیا ہے۔ ان میں اسلام کی خدمت، اسلامی علوم، عربی زبان اور ادب، طب اور سائنس شامل ہیں۔
سعودی میڈیا کے مطاق شاہ فیصل ایوارڈ کے سیکرٹری جنرل ڈاکٹرعبدالعزیز السبیل نے ایوارڈ کی 48 سالہ تاریخ کا ذکر کیا جس میں ان افراد اور اداروں کو تسلیم کیا گیا جنہوں نے انسانیت کےلیے اہم خدمات انجام دیں۔انہوں نے بتایاکہ 2026 کے ایوارڈ کے لیے ہر شعبے میں ایک علمی موضوع کا انتخاب کیا گیا ہے۔
اس مرتبہ اسلامی علوم میں (اسلامی دنیا میں تجارتی راستے)، عربی زبان اور ادب میں (فرانسیسی میں عربی ادب)، سائنس میں (ریاضی) جبکہ طب میں( مٹاپے کے علاج کو تبدیل کرنے والی دریافتیں) کا تعین کیا گیا ہے۔جبکہ اسلام کی خدمت ایک اعزازی ایوارڈ ہے جو اسلام، مسلمانوں اور انسانیت کے لیے غیرمعمولی خدمات کا اعتراف کرتا ہے۔
انہوں نے مزید کہا کہ نامزدگیاں یکم ستمبر سے 31 مارچ 2025 تک وصول کی جائیں گی۔ تعلیمی اور سائننسی اداروں کے ساتھ تحقیقی مراکز کے ذریعے بھی جمع کرائی جا سکتی ہیں۔ نامزدگیاں ای میل یا پورٹل کے ذریعے بھیجی جا سکتی ہیں۔
یاد رہے شاہ فیصل ایوارڈ 1979 میں پہلی مرتبہ تین شعبوں اسلام کی خدمت، اسلامی علوم اور عربی زبان و ادب میں دیا گیا تھا۔1980 میں دو مزید شعبے طب اور سائنس متعارف کرائے گئے۔ طب کا پہلا ایوارڈ 1982 میں اور سائنس میں دو سال بعد دیا گیا تھا۔شاہ فیصل ایوارڈ یافتگان کو دو لاکھ ڈالر، 200 گرام 24 قیراط کا گولڈ میڈل اور سرٹیفکیٹ دیا جاتا ہے۔

This website uses cookies to improve your experience. We'll assume you're ok with this, but you can opt-out if you wish. Accept Read More