ڈھاکہ (آئی پاک ٹی وی )بنگلہ دیش میں سیلاب سے بڑے پیمانے پر تباہی مچ گئی ، 15 افراد جاں بحق اور 48لاکھ سے زائد افراد متاثر ہوئے ہیںجبکہ مواصلاتی نظام درہم برہم ہو گیا ہے ۔
بنگلہ دیش کے 11 اضلاع میں شدید بارشوں کے بعد بدترین سیلابی صورتحال کے نتیجے میں 48 لاکھ افراد متاثر ہوئے ہیں اور 15 کے ہلاک ہونے کی تصدیق ہوئی ہے۔ڈھاکا اور جنوب مشرقی ساحلی شہر چٹاگانگ کے درمیان زمینی رابطہ منقطع ہو گیا، آبادیاں پانی میں ڈوبنے سے مواصلاتی نظام درہم برہم ہو گیا ہے۔تقریباً 9 لاکھ کے قریب لوگ سیلاب میں پھنسے ہوئے ہیں ، متاثرہ 11 اضلاع میں فینی، کومیلا، نوخالی، لکشمی پور اور دیگر اضلاع شامل ہیں۔
فینی میں شدید بارشوں اور سیلاب سے 92 فیصد موبائل ٹاورز گرنے کے باعث فون سروس معطل ہے ،حکام نے بتایا کہ متاثرہ علاقوں میں فوج کی جانب سے ریسکیو آپریشن جاری ہے جس میں نیوی، کوسٹ گارڈ، فائر سروسز، پولیس اور طلب بھی حصہ لے رہے ہیں۔
محکمہ موسمیات کے مطابق سیلابی علاقوں میں پھنسے ایک لاکھ 88 ہزار افراد کو ریسکیو کرکے کیمپوں میں پہنچادیا گیا ہے ، متاثرہ علاقوں میں اب تک ساڑھے تین کروڑ ٹکا کیش تقسیم کیا گیا ہے، اس کے علاوہ 20 ٹن سے زائد چاول اور 15 ہزار خشک خوراک کے پیکٹس بھی تقسیم کیے جا چکے ہیں۔