راولپنڈی (آئی پاک ٹی وی ) پاکستان اور بنگلہ دیش کے درمیان جاری دو ٹیسٹ میچوں کی سیریز کا پہلے ٹیسٹ میچ میں چوتھے روز کھانےکے وقفے تک بنگلہ دیش نے پاکستان کے 448کے جواب میں 6وکٹوں کے نقصان پر 389رنز بنا لئے ۔مشفق الرحیم 101جبکہ مہدی مرزا 17رنز بنا کر کریز پر موجود ہیں ۔
قبل ازیں راولپنڈی میں ہونے والے ٹیسٹ میچ کے چوتھے روز بنگال ٹائیگرز نے 5 کھلاڑیوں کے نقصان پر 316 رنز سے کھیل کا آغاز کیا تو مشفق الرحیم اور لٹن داس کریز پر موجود تھے۔
لٹن داس 56رنز بنا کر نسیم شاہ کا شکار بنے ۔بنگلہ دیش کی جانب سے پہلی اننگز میں شادمان اسلام نے 93، ذاکر حسن 12، کپتان نجم الحسن شانتو 16، مومن الحق 50، شکیب الحسن 15 اور لٹن داس نے 56 رنز بنائے۔
پاکستان کے نسیم شاہ نے 2، خرم شہزاد 2، محمد علی 1 اور صائم ایوب نے 1 وکٹ لی۔
پاکستان نے 6 وکٹوں کے نقصان پر 448 رنز بناکر اپنی پہلی اننگز ڈیکلیئر کر دی تھی۔ گرین شرٹس کی جانب سے عبداللہ شفیق نے 2، صائم ایوب 56، کپتان شان مسعود 6، بابراعظم 0، نائب کپتان سعود شکیل 141، محمد رضوان 171، آغا سلمان 19 اور شاہین شاہ آفریدی نے 29 رنز اسکور کیے۔
بنگلادیش کے شریف الاسلام اور حسن محمود نے 2، 2 وکٹیں حاصل کیں جبکہ مہدی حسن مرزا اور شکیب الحسن نے ایک ایک کھلاڑی کو آؤٹ کیا۔