چیمپئنز ٹرافی میں شرکت سے بھارتی انکار ،پاکستانی موقف پر آئی سی سی مشکل میں آ گیا

لاہور( آئی پاک ٹی وی ) چیمپئنز ٹرافی میں شرکت سے بھارت کی جانب سے انکار کے بعد پاکستان کی جانب سے سخت اصولی مؤقف اختیار کرنے پر انٹرنیشنل کرکٹ کونسل (آئی سی سی )مشکل میں پھنس گیا۔
تفصیلات کے مطابق چیمپئنز ٹرافی میں بھارتی کرکٹ ٹیم کی عدم شرکت پر انٹرنیشنل کرکٹ کونسل (آئی سی سی) بھارتی بورڈ (بی سی سی آئی) کی مشاورت کے بعد پی سی بی کو ردعمل دے گا۔ اس سلسلے میں آئی سی سی نے بھارتی کرکٹ بورڈ سے رابطہ کرلیاہے۔
پی سی بی نے بھی بھارتی مؤقف پر دوسرے بورڈز کے ساتھ رابطے شروع کردیے ہیں تاکہ ان کو بھارتی بورڈ کے رویے سے آگاہ کیا جا سکے۔
یاد رہے کہ پاکستان ہائبرڈ ماڈل کی مخالفت کے اپنے مؤقف پر قائم ہے جب کہ بھارت کی جانب سے ٹیم کو پاکستان نہ بھیجنے کے فیصلے نے آئی سی سی کی مشکلات میں اضافہ کردیا ہے۔

پی سی بی کی ای میل کا آئی سی سی کی جانب سے فوری جواب ملنا ممکن نہیں، جواب تیار کرنے میں کچھ دن لگیں گے۔ پاکستان کی طرف سے ای میل میں بھارتی ٹیم کے انکار کی ٹھوس وجوہات بتانے پر اب آئی سی سی نے بھارتی کرکٹ بورڈ سے رابطہ کیاہے، جس میں ان سے پی سی بی کے سوالات پر تبادلہ خیال اور ممکنہ جوابات مانگے گئے ہیں ہیں تاکہ پاکستان کرکٹ بورڈ کی ای میل کاجواب دیا جاسکے۔
بھارتی بورڈ تمام قانونی پہلوؤں کو سامنے رکھتے ہوئے اپنا تحریری مؤقف دے گا، جس کی روشنی میں آئی سی سی پاکستان کرکٹ بورڈ کو جوابی ای میل کرے گا۔ آئی سی سی حکام پاکستان بھارت معاملے پر دوسرےممالک سے بھی مشاورت کررہےہیں تاکہ اس مسئلے کا کوئی پائیدار حل ڈھونڈا جاسکے۔