اسلام آباد(آئی پاک ٹی وی ) وزیراعظم شہباز شریف کا کہناہے کہ سمگلنگ کے ناسور کے ملک سے مکمل خاتمے کےلیے تمام ادارے اپنی کوششیں تیز کریں۔
تفصیلات کے مطابق وزیراعظم شہباز شریف کی زیر صدارت سمگلنگ کی روک تھام سے متعلق جائزہ اجلاس ہوا جس میں متعلقہ اداروں کے حکام نے شرکت کی اور اجلاس میں سمگلنگ کی روک تھام اور اب تک کے نتائج پر تفصیلی بریفنگ دی گئی۔
وزیراعظم شہباز شریف نے ہدایت کی کہ سمگلرز، ان کے سہولت کاروں اور سمگلنگ میں استعمال ہونے والی گاڑیاں ضبط کر کے کاروائی کی جائے، سمگلنگ میں ملوث افراد کو پاکستان کی معیشت کو نقصان پہنچانے نہیں دیں گے۔
وزیراعظم کا کہنا تھا کہ سمگلنگ کی روک تھام کے لیے جدید ٹیکنالوجی کا استعمال یقینی بنایا، خوش آئندہ امر ہے کہ متعلقہ اداروں کی کارروائیوں کے نتیجے میں سمگلنگ میں کمی واقع ہوئی ہے، ایف بی آر، وزارت داخلہ اور دیگر ادارے آپس میں تعاون مزید بہتر کریں۔
شہبازشریف نے مزید کہا کہ سرحدی علاقوں میں لوگوں کو روزگار کے مواقع فراہم کرنے کے لیے جامع حکمت عملی پیش کی جائے، سمگلنگ کے ناسور کے ملک سے مکمل خاتمے کے لیے تمام ادارے اپنی کوششیں تیزکریں۔