بھارت کی جانب سے چیمپئنز ٹرافی میں شرکت سے انکار کا کوئی باضابطہ اطلاع نہیں ملی ،چیئرمین پی سی بی

لاہور( آئی پاک ٹی وی ) بھارت کے چیمپئنز ٹرافی 2025کیلئے پاکستان آنے سے انکار پر پاکستان کرکٹ بورڈ کے چیئرمین محسن نقوی کا موقف سامنے آ گیا ہے۔
پی سی بی چیئرمین محسن نقوی نے کہا ہے کہ دو ماہ سے بھارتی میڈیا پر خبریں آ رہی ہیں کہ وہ آئی سی سی چیمپئنز ٹرافی کھیلنے کے لیے پاکستان نہیں آ رہے، لیکن اس حوالے سے اب تک بھارت کی جانب سے انکار کا کوئی باضابطہ لیٹر یا اطلاع مجھے یا پی سی بی کو نہیں دی گئی ہے۔ کوئی ایسی چیز آتی ہے تو اپنی حکومت سے بات کرونگا اور پھر حکومت جو کہے گی اس پر عمل کریں گے۔
پی سی بی چیئرمین کا کہنا تھا کہ میں چاہتا ہوں کرکٹ سیاست سے پاک ہو، کوئی بھی ملک ہو، اختلاف اپنی جگہ لیکن کھیل میں سیاست نہیں ہونی چاہیے اور کسی بھی ملک کو کرکٹ پر سیاست نہیں کرنی چاہیے۔ میں ابھی تو کہہ نہیں رہا کہ میں سخت ہوں لیکن جب وقت آئے گا، تو پتہ چل جائے گا۔
محسن نقوی نے واضح کیا کہ میں پہلے ہی کہہ چکا ہوں کہ اگر ایسی کوئی چیز ہوگی تو تحریری طور پر دیں تب ہی قبول کریں گے۔ ہم سے اب تک کسی ہائبرڈ ماڈل پر بات نہیں ہوئی ہے اور جہاں تک مجھے پتہ ہے، ہر ملک کی خواہش ہے کہ چیمپئنز ٹرافی پاکستان میں ہی ہو۔
پی سی بی چیئرمین نے کہا کہ پاکستان ہر بار بھارت کے ساتھ مثبت رویہ رکھتا ہے لیکن اب امید نہ رکھے۔ ہم آئی سی سی سے بھی چیمپئنز ٹرافی کا جلد باضاطہ شیڈول کے اجرا کی امید رکھتے ہیں۔ دسمبر سے قبل اسٹیڈیمز کا گرے اسٹرکچر مکمل ہو جائے گا اور اس کے بعد حتمی کام مکمل کریں گے۔
محسن نقوی نے آسٹریلیا کیخلاف کامیابی پر پوری قوم کو مبارکباد پیش کرتے ہوئے کہا کہ پاکستان نے 2017 کے بعد آسٹریلیا کو شکست دی۔ اس جیت کا کریڈٹ پوری ٹیم کو دوں گا کیونکہ ہمیشہ کی طرح یہ ایک ٹیم ورک ہے۔ جو کچھ عرصے سے نہیں جیت رہے تھے، اب جیت کر دکھائیں گے۔ امید ہے ٹیم آنے والے دنوں میں اچھی خوشخبریاں دے گی۔ وائٹ بال ٹیم کے کوچ پر مشاورت چل رہی ہے، ٹیم جو فیصلہ کریگی وہ کرینگے۔

 

This website uses cookies to improve your experience. We'll assume you're ok with this, but you can opt-out if you wish. Accept Read More