خیبر پختونخوا حکومت کا پی آئی اے کی خریداری میں دلچسپی کا اظہار

پشاور ( آئی پاک ٹی وی ) خیبر پختونخوا حکومت نے پاکستان انٹرنیشنل ایئرلائنز (پی آئی اے )کی خریداری میں دلچسپی کا اظہار کیا ہے۔
تفصیلات کے مطابق خیبر پختونخوا بورڈ آف انوسٹمنٹ اینڈ ٹریڈ نے وفاقی وزیر نجکاری علیم خان کو خط لکھ دیا، جس میں کہا گیا ہے کہ خیبر پختونخوا حکومت قوم ایئر لائن پی آئی اے کی نیلامی کے عمل میں حصہ لینا چاہتی ہے۔
خیبر پختونخوا کی جانب سے کہا گیا ہے کہ پی آئی اے قومی ائیر لائن ہے، نہیں چاہتے بیرونی یا نجی ہاتھوں میں جائے،نجی کمپنی کی 10 ارب روپے کے اوپر سے نیلامی شروع کرنےکیلئے تیار ہیں،وفاقی حکومت ہماری درخواست قبول کرے۔
گزشتہ روزپی آئی اے کی نجکاری کیلئے بولی ہوا،کنسورشیم نے پی آئی اے کیلئے بولی کی رقم بڑھانےسے معذرت کر لی، کنسورشیم کا کہنا ہے ہمارے مطابق بولی کیلئےیہی بہترین قیمت ہے ،اگر حکومت پی آئی اے کی اس قیمت پر نجکاری نہیں کرتی تو خود چلائے۔
کنسورشیم نے پی آئی اے کی نجکاری کیلئے 10ارب روپے کی بولی لگائی تھی،بلیو ورلڈ کنسورشیم کی جانب سے سنگل بڈ جمع کرائی گئی تھی۔
بلیو ورلڈ سٹی کنسورشیم کے علاوہ کسی اور گروپ نے کاغذات جمع نہیں کرائے،وفاقی کابینہ سے پی آئی اے کی ریزرو پرائس کی منظوری سرکولیشن سے حاصل کی جائے گی۔
یاد رہے حکومت نے پی آئی اے کی نجکاری کے لیے کم از کم قیمت 85ارب 30 لاکھ روپے مقرر کی تھی۔
سابق وزیر خزانہ مفتاح اسماعیل نے کہا کہ پی آئی اے کیلئے 6 میں سے ایک نے بولی دی وہ بھی ریزرو پرائس کے 12فیصد ہے ، 6سال پہلے ن لیگ پی آئی اے کی نجکاری کرنا چاہتی تھی تو پی ٹی آئی نے احتجاج کیا ۔
اسد عمر اور اسحاق ڈار نے معاہدہ کیا تھا کہ پی آئی اے کی نجکاری نہیں ہو گی ، بڑا سٹیک حکومت کے پاس رہے گا ، پوچھنا چاہیے ہر سال پی آئی اے 100ارب روپے کا نقصان کر رہی ہے اس کا ذمہ دار کون ہے ۔
پانچ سال میں پی آئی اے 400ارب روپے نقصان کر چکی ہے ، اگر آج پی آئی اے کو نہیں بیچتے تو اگلے سال پھر 100ارب روپے کا نقصان ہو گا ۔