وزیرِ اعظم غزہ اور فلسطین میں ظلم و جبر کے شکار نہتے فلسطینیوں کی آواز بن گئے

ریاض (آئی پاک ٹی وی ) وزیرِ اعظم محمد شہباز شریف ریاض میں غزہ اور فلسطین میں ظلم و جبر کے شکار نہتے فلسطینیوں کی آواز بن گئے۔
سعودی عرب کے شہر ریاض میں بین الاقوامی سرمایہ کاری کیلئے منعقدہ فیوچر انویسٹمنٹ انیشی ایٹیو میں وزیرِاعظم شہباز شریف نے خطے اور عالمی ترقی کیلئے غزہ و فلسطین میں ظلم و ستم کے خاتمے کو لازمی قرار دے دیا.
غزہ اور فسلطین کے نہتے مسلمان بہن بھائیوں کے حق میں آواز اٹھانے پر پورا ہال تالیوں سے گونج اٹھا۔
وزیرِ اعظم محمد شہباز شریف نے آٹھویں فیوچر انویسٹمنٹ انیشی ایٹیو کانفرنس میں شرکاء سے خطاب کرتے ہوئے کہا کہ یہ کانفرنس فرمانروا سعودی عرب و خادم الحرمین شریفین بادشاہ سلمان بن عبدالعزیز اور ولی عہد سعودی عرب شہزادہ محمد بن سلمان کا سعودی عرب و خطے کی ترقی و خوشحالی کے ویژن کی تکمیل کیلئے نہایت شانداد اقدام ہے۔
وزیاعظم شہبازشریف کا کہنا تھا کہ پاکستان معاشی مشکلات سے نکل کر مستحکم معیشت کے ہدف کے حصول کے بعد ترقی کی راہ پر گامزن ہو چکا۔پاکستان میں ترقی کی راہیں کھولنے کیلئے حکومت نے کاروباری سرگرمیوں اور سرمایہ کاری میں اضافے کیلئےجامع اصلاحات کا عمل شروع کیا۔
وزیرِاعظم کا کہنا تھا کہ ایک روشن مستقبل کی طرف گامزن اور خطے میں اقتصادی روابط کے مرکز کے طور پر پاکستان کا ویژن اقتصادی استحکام اور ترقی کا ہے۔طاقت کے سرچشمے عوام اور ہمارے برادر ممالک و ترقیاتی شراکت داروں کے تعاون سے حکومت چند ہی ماہ میں معاشی استحکام کے حصول میں کامیاب ہو چکی۔
ان کا کہنا تھا کہ پاکستان کی باصلاحیت، باہمت اور توانائیوں سے بھرپور نوجوان آبادی، ہمارے روشن مستقبل کی نوید اور پاکستان کا سب سے بڑا اثاثہ ہیں۔شہزادہ محمد بن سلمان کے سعودی عرب کے ویژن 2030 کی طرز پر حکومتِ پاکستان بھی اپنے ملک کے نوجوانوں کی ترقی و خوشحالی میں سرمایہ کاری کر رہی ہے۔حکومت پاکستان نوجوانوں کو مصنوعی ذہانت، تعلیم اور صحت عامہ کے حوالے سے با اختیار بنانے کیلئے ترجیحی بنیادوں پر اقدامات اٹھا رہی ہے اور اس حوالے سے مفید شراکت داریوں کے قیام کی خواہاں ہے۔
وزیراعظم شہباز شریف نے کہا کہ پاکستان مصنوعی ذہانت کے شعبے میں سرمایہ کاری کرنے کے ساتھ ساتھ اسے دنیا میں زراعت، موسمیاتی تبدیلی کے حوالے سے برداشت اور غیر مصدقہ انفارمیشن کو روکنے کیلئے ایک مفید ذریعہ سمجھتا ہے۔پاکستانی حکومت مختلف اقدامات کے ذریعے مصنوعی ذہانت کی بے پناہ استعداد سے استفادے کیلئے کوشاں ہے۔
انہوں نے مزید کہا کہ اپنے دور حکومت میں شروع کئے گئے دانش اسکولز اور ایجوکیشن اینڈاؤمنٹ فنڈ کی بدولت جدید تعلیم تک رسائی آسان ہوئی۔دانش اسکولز کے طلباء ڈاکٹرز اور انجینئیرز بن کر آج نہ صرف پاکستان بلکہ دنیا بھر میں ملک و قوم کا نام روش کر رہے ہیں۔اسی طرح صحت کے شعبے میں بھی پاکستان ترقی کی منازل طے کر رہا ہے۔پاکستان میں پونے تین لاکھ رجسٹرڈ ڈاکٹرز شعبہ طب میں جدت کیلئے کام کے ساتھ ساتھ پاکستانی میڈیکل گریجیوئیٹس پوری دنیا میں گراں قدر خدمات سر انجام دے رہے ہیں۔
شہباز شریف کا کہنا تھا کہ ہم تمام دنیا اور دوست ممالک کے ساتھ مل کر ایک ایسے مستقبل کی تشکیل چاہتے ہیں جو جدت پر مبنی ہو اور مجموعی طور پر خطے اور دنیا کے ممالک کی ترقی اس میں شامل ہو۔