جابرانہ اقدامات کشمیریوں کے حق خود ارادیت کی تڑپ کو کم نہیں کر سکتے: وزیراعظم

اسلام آباد(آئی پاک ٹی وی ) وزیراعظم شہباز شریف کا کہنا ہے کہ جابرانہ اقدامات کشمیریوں کے حق خود ارادیت کی تڑپ کو کم نہیں کر سکتے۔

وزیراعظم شہباز شریف کا یوم سیاہ کشمیر پر اپنے پیغام میں کہنا تھا کہ 77 برس قبل آج کے دن بھارت نے کشمیر پر قبضہ کیا، بھارتی قابض افواج کشمیریوں پر ظلم ڈھا رہی ہے، مقبوضہ کشمیر کے عوام نے گزشتہ 77 برسوں کے دوران بے شمار مشکلات کا سامنا کیا ہے۔
وزیراعظم شہباز شریف نے کہا کہ بھارت 5 اگست 2019 سے مقبوضہ کشمیر پر اپنی گرفت مضبوط کرنے کیلئے یکے بعد دیگرے اقدامات کر رہا ہے۔
وزیراعظم کا کہنا تھا کہ بھارت کے مذموم عزائم کا مقصد مقبوضہ کشمیر کی متنازعہ حیثیت کو نقصان پہنچانا اور کشمیری عوام کو اپنے مستقبل کا فیصلہ کرنے کے ان کے جمہوری حق سے محروم کرنا ہے، جابرانہ اقدامات کشمیری عوام کی حق خود ارادیت کی تڑپ کو کم نہیں کر سکتے۔
شہباز شریف نے مزید کہا کہ کشمیری عوام کی قربانیاں رائیگاں نہیں جائیں گی، پاکستان کشمیریوں کی مکمل حمایت جاری رکھے گا۔