راولپنڈی ٹیسٹ :پاکستان 4سال بعد ہوم سیریز جیت گیا ،انگلینڈ کو 9وکٹوں سے شکست

راولپنڈی(آئی پاک ٹی وی ) پاکستان نے انگلینڈ کو پنڈی ٹیسٹ میں 9 وکٹوں سے شکست دیکر سیریز اپنے نام کر لی۔شاہین چار برس بعد ہوم سیریز جیت گئے ۔

تفصیلات کے مطابق پاکستان اور انگلینڈ کے درمیان سیریز کا تیسرا اور آخری ٹیسٹ میچ راولپنڈی کرکٹ سٹیڈیم میں کھیلا گیا ۔
ٹیسٹ میچ کے دوسرے روز کے اختتام تک انگلینڈ نے 3 وکٹوں کے نقصان پر 24 رنز بنا لیے تھے، انگلینڈ نے پہلی اننگز میں 267 رنز بنائے تھے جس کے بعد پاکستانی ٹیم 344 رنز بنا کر آؤٹ ہو گئی تھی۔
پاکستان اور انگلینڈ کے درمیان 3 ٹیسٹ میچز پر مشتمل سیریز کے تیسرے اور فیصلہ کن میچ کے تیسرے روز مہمان ٹیم نے 24 رنز پر 3 کھلاڑی آؤٹ سے اپنی نامکمل اننگز کا آغاز کیا۔
انگلینڈ کی دوسری اننگز کا آغاز انتہائی مایوس کن رہا، میچ کے دوسرے روز کے آخری لمحات پر زیک کرالی 2، بین ڈکٹ 12 اور اولی پوپ صرف ایک رن بنانے کے بعد آؤٹ ہوئے جبکہ میچ کے تیسرے روز ہیری بروک نے کچھ مزاحمت دکھائی لیکن وہ بھی 26 رنز پر اپنی وکٹ گنوا بیٹھے۔
ہیری بروک کے بعد کپتان بین سٹوکس کریز پر آئے مگر پہلی اننگز کی طرح دوسری اننگز میں بھی ٹیم کو سہارا نہ دے سکے اور صرف 3 رنز کے مہمان ثابت ہوئے، ان کے بعد جمی سمتھ جو روٹ کا ساتھ دینے میدان میں آئے مگر ساجد خان نے ان کی ایک نہ چلنے دی اور محض 3 رنز پر پویلین بھیج دیا۔جو روٹ کی ہمت بھی 33 رنز پر جواب دے گئی، نعمان علی نے ان کو چلتا کیا بعدازاں گُس ایٹکنسن 97 کے مجموعے پر ساجد خان کا شکار بنے۔
انگلینڈ کی نویں وکٹ 106 رنز پر گری، ریحان احمد 7 رنز بنا کر ساجد خان کی گیند پر آؤٹ ہوئے تاہم بائیں ہاتھ کے بلے باز جیک لیچ بھی کوئی مزاحمت نہ دکھا سکے اور 10 رنز بنا کر نعمان علی کی گیند پر سٹمپ آؤٹ ہو گئے۔
پاکستان کی جانب سے سپنرز نے ایک بار تباہ کن باؤلنگ کرتے ہوئے انگلش بلے بازوں کو گھما دیا، دوسری اننگز میں نعمان علی نے 6 اور ساجد خان نے 4 کھلاڑیوں کو پویلین کی راہ دکھائی۔
قبل ازیں قومی ٹیم نے راولپنڈی ٹیسٹ میچ کے دوسرے روز 3 وکٹوں کے نقصان پر 73 رنز سے بیٹنگ کا آغاز کیا تو کپتان شان مسعود اور سعود شکیل 16، 16 رنز بنا کر کریز پر موجود تھے، تاہم یہ سکور میں زیادہ اضافہ نہ کرسکے اور قومی کپتان 26 رنز بنا کر سپنر شعیب بشیر کی گیند پر سلپ میں کیچ دے بیٹھے۔
سعود شکیل کا ساتھ دینے وکٹ کیپر بیٹر محمد رضوان کریز پر پہنچے، دونوں نے مل کر ٹیم کا مجموعی سکور 151 رنز تک پہنچایا تاہم ریحان احمد نے اس اہم پارٹنر شپ کا خاتمہ کر دیا۔
محمد رضوان 25 رنز بنا کر ایل بی ڈبلیو ہو گئے اور 151 رنز پر قومی ٹیم کے آدھے کھلاڑی پویلین لوٹ گئے، دوسرے اینڈ پر بائیں ہاتھ کے بلے باز سعود شکیل نے اچھی بیٹنگ جاری رکھتے ہوئے اپنی نصف سنچری مکمل کی۔
پاکستان کو چھٹا نقصان سلمان علی آغا کی صورت میں اٹھانا پڑا، وہ ایک رن بنا کر ریحان احمد کا شکار بنے، قومی ٹیم کے آل راؤنڈر عامر جمال بھی ناکام رہے اور ریحان احمد کی گیند پر 14 رنز بنا کر بولڈ ہو گئے۔سعود شکیل نے بہترین کھیل کا مظاہرہ کرتے ہوئے 180 گیندوں پر 4 چوکوں کی مدد سے کیریئر کی چوتھی سنچری مکمل کی۔نعمان علی بھی سعود شکیل کا ساتھ چھوڑ گئے، آف سپنر 2 چوکوں اور ایک چھکے کی مدد سے 84 گیندوں پر 45 رنز بنا کر شعیب بشیر کی گیند پر ایل بی ڈبلیو ہو گئے۔
134 کے انفرادی سکور پر بائیں ہاتھ کے بلے باز سعود شکیل بھی ہمت ہار گئے اور گُس ایٹنگسن کی گیند پر کیچ دے بیٹھے بعدازاں نئے آنیوالے لیگ سپنر زاہد محمود بغیر کھاتہ کھولے ہی پویلین چلتے بنے۔
انگلینڈ کی جانب سے ریحان احمد نے 4، شعیب بشیر نے 3، گّس ایٹکنسن نے 2 جبکہ چیک لیچ نے ایک کھلاڑی کو آؤٹ کیا۔

 

This website uses cookies to improve your experience. We'll assume you're ok with this, but you can opt-out if you wish. Accept Read More