لاہور(آئی پاک ٹی وی ) سابق وزیراعظم اور پاکستان مسلم لیگ (ن) کے صدر میاں نواز شریف لاہور سے دبئی کیلئے روانہ ہوگئے۔
قائد مسلم لیگ ن نواز شریف غیر ملکی ایئرلائن کی پرواز ای کے 625 کے ذریعے صبح 9 بج کر 22 منٹ پر روانہ ہوئے۔
سابق وزیراعظم نواز شریف ایک سال 4 دن کے بعد بیرون ملک روانہ ہوئے ہیں، سابق وزیراعظم گزشتہ سال 21 اکتوبر کو لندن سے براستہ دبئی لاہور پہنچے تھے۔
سابق وزیراعظم و قائد مسلم لیگ ن نواز شریف 5 ممالک کا دورہ کریں گے جن میں دبئی، امریکا، لندن اور یورپ کے ممالک شامل ہیں۔ دبئی میں ان کا قیام ایک روز کے لیے ہوگا جس کے بعد وہ لندن جائیں گے۔
قائد مسلم لیگ ن نواز شریف 29 اکتوبر کو لندن سے امریکا جائیں گے جہاں 4 روز قیام کے بعد واپس لندن پہنچیں گے جبکہ وزیراعلیٰ پنجاب مریم نواز نومبر کے پہلے ہفتے میں لندن جائیں گی، چند روز قیام کے بعد نواز شریف اور مریم نواز یورپ کے مختلف ممالک کے دورے کریں گے۔
نواز شریف بیرون ممالک کے دوروں کے دوران اہم ملاقاتیں بھی کریں گے، نوازشریف کا اپنے چیک اَپ کے لیے لندن کا دورہ شیڈول تھا لیکن آئینی ترامیم کے باعث انہوں نے اپنا دورہ دو بار ملتوی کیا تھا تاہم اب نواز شریف لندن میں اپنا چیک اَپ بھی کروائیں گے۔
انہوں نے کہا کہ نواز شریف کی لندن میں چند اہم سیاسی ملاقاتیں بھی متوقع ہیں۔