پنڈی ٹیسٹ کا دوسرا دن: پاکستان نے پہلی اننگز میں 7 وکٹوں پر187 رنز بنا لیے

راولپنڈی (آئی پاک ٹی وی ) انگلینڈ کے خلاف پنڈی اسٹیڈیم میں کھیلے جا رہے تیسرے اور فیصلہ کن ٹیسٹ میچ میں پاکستان نے پہلی اننگز میں 7 وکٹوں پر187 رنز بنا لیے ہیں۔
تفصیلات کے مطابق پنڈی ٹیسٹ کے دوسرے روز پاکستان نے اپنی پہلی نا مکمل اننگ کا آغاز 3 وکٹوں پر 73 رنز سے کیا اور پہلے سیشن میں سست بیٹنگ کا مظاہرہ کرتے ہوئے ٹیم کے مجموعے میں 3 وکٹیں گنوا کر صرف 82 رنز کا ہی اضافہ کیا۔
کھانے کے وقفے تک پاکستان نے 6 وکٹوں کے نقصان پر 155 رنز بنا لیے تھے اور اسے انگلینڈ کی پہلی اننگ کی برتری ختم کرنے کے لیے اب بھی 112 رنز درکار جب کہ صرف چار وکٹیں باقی ہیں۔ کریز پر نائب کپتان سعود شکیل 63 اور عامر جمال 10 رنز کے ساتھ موجود ہیں۔
کپتان شان مسعود ایک بار پھر ناکام ثابت ہوئے اور 26 رنز بنا کر شعیب بشیر کی وکٹ بن گئے۔ محمد رضوان نے 25 اور سلمان علی آغا نے ایک رن بنایا، دونوں وکٹیں ریحان احمد نے حاصل کیں۔
انگلینڈ کی جانب سے شعیب بشیر اور ریحان احمد نے دو، دو جب کہ جیک لیچ اور اٹکنسن نے ایک، ایک وکٹ حاصل کی۔
انگلش کپتان بین اسٹوکس نے ٹاس جیت کر پہلے بیٹنگ کا فیصلہ کیا اور پوری ٹیم پاکستانی اسپنرز کے جال میں پھنس کر 267 رنز پر ڈھیر ہوگئی تھی۔ جیمی اسمتھ (89) اور بین ڈکٹ (52) کے علاوہ کوئی بھی بلے باز اسپنرز کی گھومتی گیندوں کا سامنا کرنے سے قاصر رہا تھا۔
انگلش ٹیم کے پانچ بیٹر ڈبل فیگر میں بھی داخل نہ ہوسکے تھے۔ گس اٹکنس (39)، زک کرولی (29)، جیک لیچ (16) اور بین اسٹوکس (12) رنز ہی بنا سکے۔
پاکستانی اسپنرز نے مسلسل تیسری اننگ میں انگلینڈ کی پوری ٹیم کو ٹھکانے لگایا۔ ساجد خان نے 6 وکٹیں حاصل کیں جب کہ نعمان علی نے تین اور زاہد محمود نے ایک کھلاڑی کو آؤٹ کیا۔
پاکستان کی اننگ کا آغاز بھی اچھا نہ ہوا اور پہلے دن کے اختتام پر 46 رنز پر 3 وکٹیں گر چکی تھیں۔ عبداللہ شفیق (14)، صائم ایوب (19) اور کامران غلام (3) رنز کے انفرادی اسکور پر پویلین لوٹ گئے تھے۔
تین ٹیسٹ میچوں کی سیریز ایک، ایک سے برابر ہے۔ پنڈی ٹیسٹ سیریز کی فاتح ٹیم کا فیصلہ کرے گا۔ ٹیسٹ ڈرا ہونے کی صورت میں سیریز بھی برابر رہے گی۔
پنڈی ٹیسٹ کے لیے پاکستان کے ملتان ٹیسٹ کے وننگ اسکواڈ کو برقرار رکھا گیا ہے جب کہ انگلش ٹیم میں دو تبدیلیاں کی گئی ہیں۔