آئی سی سی اجلاس میں شرکت کیلئے چیئرمین پی سی بی محسن نقوی دبئی روانہ

لاہور(آئی پاک ٹی وی ) پاکستان کرکٹ بورڈ (پی سی بی ) چیئرمین محسن نقوی انٹرنیشنل کرکٹ کونسل (آئی سی سی) اجلاس میں شرکت کیلئے دبئی روانہ ہوگئے۔محسن نقوی کی آج بھارتی کرکٹ بورڈ حکام سے بھی ملاقات متوقع ہے۔
تفصیلات کے مطابق چیئرمین پی سی بی محسن نقوی آج آئی سی سی کے بورڈ اجلاس میں شرکت کریں گے۔وہ قذافی اسٹیڈیم میں تعمیراتی کاموں کا جائِزہ لینے کے بعد لاہور سے دبئی روانہ ہوئے۔
آئی سی سی بورڈ اجلاس میں آئی سی سی چیمپئنز ٹرافی کی تیاریوں پر بات ہوگی۔ بورڈ سربراہ اب تک ہونے والی پیش رفت پر شرکا کو اعتماد میں لیں گے۔
آئی سی سی اجلاس انیس اکتوبر سے جاری ہیں، جس میں چیف آپریٹنگ آفیسر سلمان نصیر پہلے سے ہی مختلف میٹنگز میں پاکستان کی نمائندگی کے لےموجود ہیں۔
آج آخری روز ہونےوالا بورڈ اجلاس پاکستان کی میزبانی میں ہونےوالی آئی سی سی چیمپئنز ٹرافی کے حوالےسے بہت اہمیت رکھتا ہے۔ چیئرمین پی سی بی قذافی اسٹیڈیم ، نیشنل بنک کراچی اور پنڈی میں رنیووشن کاموں پر اجلاس میں بریفینگ دیں گے۔
آئی سی سی کے وفود بھی پاکستان آکر جاری تعمیراتی کاموں پر اطمینان کا اظہار کرچکےہیں۔بورڈ ممبران نے چیمپئِنزٹرافی کا بجٹ بھی منظور کررکھاہے۔