آئینی ترمیم کی منظوری قومی اتفاق رائے کی شاندار مثال ہے، وزیر اعظم

اسلام آباد(آئی پاک ٹی وی ) سینیٹ اور قومی اسمبلی سے 26 ویں آئینی ترمیم کی دو تہائی اکثریت سے منظوری کے بعد اجلاس سے خطاب کرتے ہوئے وزیر اعظم شہباز شریف نے کہا کہ ترمیم کی منظوری قومی اتفاق رائے کی شاندار مثال ہے۔
وزیراعظم نے کہا کہ آج چارٹر آف ڈیمو کریسی کا ادھورا خواب پایہ تکمیل کو پہنچا اس سے قبل ملک کے منتخب وزرائے اعظم کو گھر بھیج دیا جاتا تھا، اب ایسا نہیں ہوگا۔
شہباز شریف نے کہا کہ پاکستان کی تاریخ میں آج کا دن عظیم دن ہے، آج یہ ثابت ہو گیا کہ پارلیمنٹ عظیم ہے، ماضی میں جمہوری حکومتوں کا خاتمہ کیا گیا، لاکھوں لوگوں کو انصاف نہیں ملتا۔
چارٹر آف ڈیموکریسی کرنے والوں کو خراج تحسین پیش کرتے ہوئے وزیر اعظم شہباز شریف نے کہا کہ شہید بے نظیر بھٹو اور قائد محمد نواز شریف نے چارٹر آف ڈیموکریسی کی بنیاد رکھی۔بلاول بھٹو نے آئینی ترمیم پر خلوص دل کے ساتھ محنت کی۔
وزیراعظم شہباز شریف نے کہا کہ ترامیم کے بعد انصاف کے حصول میں آسانی ہوگی، آج اراکین پارلیمنٹ نے پاکستان کے آئین میں ایسی ترامیم کی ہیں جن سے ان شاءاللہ ملک کا مستقبل محفوظ ہوگا،
شہباز شریف نے کہا کہ پورے ملک میں یہ پیغام گیا کہ پارلیمان میں موجود جماعتوں نے پاکستان کے لئے اپنے ذاتی مفاد کو قربان کیا، تمام جماعتوں نے آگے بڑھ کر 26 ویں ترمیم منظور کی جو پاکستان کی تاریخ میں سنگ میل کی حیثیت رکھے گی۔
وزیراعظم نے مولانا فضل الرحمان کا شکریہ ادا کرتے ہوئے کہا کہ مولانا نے پاکستان کے بہترین مفاد میں نہ صرف گفت و شنید کی بلکہ آگے بڑھ کر اپنا نقطہ نظر پیش کیا۔

This website uses cookies to improve your experience. We'll assume you're ok with this, but you can opt-out if you wish. Accept Read More