حکومت نے عافیہ صدیقی کی سزا معافی کیلئے امریکی صدر کو خط لکھ دیا

اسلام آباد ( آئی پاک ٹی وی ) وفاقی حکومت نے ڈاکٹر عافیہ صدیقی کی سزا معافی کیلئے امریکی صدر جوبائیڈن کو خط لکھ دیا۔
تفصیلات کے مطابق اسلام آباد ہائیکورٹ کے جسٹس سردار اعجاز اسحاق خان نے ڈاکٹر عافیہ صدیقی کی امریکی جیل سے رہائی اور وطن واپسی کے کیس کی سماعت کی ، ایڈیشنل اٹارنی جنرل منور اقبال عدالت میں پیش ہوئے۔
ایڈیشنل اٹارنی جنرل نے آگاہ کیا کہ وزیر اعظم شہباز شریف نے عافیہ صدیقی کی سزا معافی کے لیے امریکی صدر کو خط لکھ دیا ہے۔
وزیراعظم شہباز شریف نے امریکی صدر کو لکھا ہے کہ آپ کو ہمیشہ پاکستان اور عوام کا دوست پایا، کیری لوگر بل کی 15سال قبل منظوری میں آپکا کردار یاد ہے۔
خط میں کہا گیا کہ میں آپکی توجہ اہم معاملے کی طرف دلانا چاہتا ہوں، عافیہ صدیقی 2010 سے امریکی جیل میں ہیں ، انہیں امریکی ڈسٹرکٹ کورٹ نے 86 سال قید کی سزا سنا رکھی ہے، وہ 16سال قید کاٹ چکی ہیں۔
وزیراعظم شہباز شریف نے لکھا کہ بطور وزیراعظم معاملے میں مداخلت میری ذمہ داری ہے، آپ انسانی ہمدرد ی کی بنیاد پر عافیہ صدیقی کی سزا معاف کر کے رہائی کا آرڈر کریں، عافیہ صدیقی کی فیملی اور لاکھوں پاکستانی میرے ساتھ آپکی عنایت کے منتظر ہیں۔

 

This website uses cookies to improve your experience. We'll assume you're ok with this, but you can opt-out if you wish. Accept Read More