علیمہ خان اور عظمیٰ خان کے مزید جسمانی ریمانڈ کی درخواست مسترد

اسلام آباد(آئی پاک ٹی وی ) انسداد دہشت گردی عدالت نے ڈی چوک احتجاج پر گرفتار سابق وزیراعظم اورپاکستان تحریک انصاف (پی ٹی آئی ) عمران خان کی بہنوں علیمہ خان اور عظمیٰ خان کے مزید جسمانی ریمانڈ کی درخواست مسترد کردی اور انہیں جوڈیشل ریمانڈ پر جیل بھیج دیا۔
تفصیلات کے مطابق ڈی چوک احتجاج کے مقدمات میں گرفتار علیمہ خان اور عظمی خان کو اے ٹی سی میں پیش کیا گیا۔ پی ٹی آئی رہنما شاندانہ گلزار اور بانی پی ٹی آئی کی بہن نورین نیازی بھی عدالت پہنچے۔ پی ٹی آئی وکلاء بھی موجود تھے۔ کیس کی سماعت انسداد دہشت گردی عدالت کے جج طاہر عباس سپرا نے کی۔ بانی پی ٹی آئی کی بہنوں کی جانب سے ایڈووکیٹ عثمان گل اور نیاز اللہ نیازی پیش ہوئے جب کہ پراسیکیوٹر راجہ نوید تھے۔
انسداد دہشت گردی عدات کے جج طاہر عباس سپرا نے دونوں بہنوں کو روسٹرم پر بلالیا۔ عظمیٰ خان و علیمہ خان کے وکیل نیاز اللہ نیازی نے کہا کہ سات اکتوبر کا حکمنامہ پڑھ لیں سب واضح ہے بیلف رپورٹ بھی ریکارڈ پر ہے، دوسری عدالت میں میگا فون آگیا۔
نیاز اللہ صاحب آپ لوگ ان لوگوں کو راستہ تو خود بتاتے ہیں، انہوں نے وہ بات پکڑ لی جب کہا گیا کہ میگا فون کہاں ہے؟
تحریک انصاف کے وکیل عثمان گل نے کہا کہ دونوں ملزمان خواتین ہیں، پراسیکیوٹر کی جانب سے دونوں ملزماؤں کے پندرہ روزہ جسمانی ریمانڈ کی استدعا کی گئی مگر کسی اسپیشل گزیٹیڈ افسر کی جانب سے خواتین کے جسمانی ریمانڈ کے حوالے سے کوئی درخواست نہیں ہے، قانون کے مطابق گرفتاری کے چوبیس گھنٹوں بعد عدالت میں پیش کرنا لازمی ہوتا ہے۔
عثمان ریاض گل نے عدالت میں وڈیو چلانے کی استدعا کر دی اور کہا کہ یہ ثبوت موجود ہیں کہ یہ سب غیر قانونی ہے۔
جج طاہر عباس سپرا نے کہا کہ آپ ایک یو ایس بی دے رہے ہیں آپ کو اور مجھے پتا ہے کہ اس ثبوت کی کیا قانونی حیثیت ہے، میں تفتیشی افسر یا مجسٹریٹ نہیں ہوں کیا یہ آپ کا گراؤنڈ ہے، آپ یہ یو ایس بی تفتیشی افسر کو دیں۔
جج طاہر عباس سپرا نے آئی او سے پوچھا کہ تفتیشی افسر صاحب آپ کو ریمانڈ کیوں چاہیے؟ آپ نے آٹھ دنوں میں کیا ریکوری کی ہے؟
پراسیکیوٹر راجہ نوید نے کہا کہ جو سازش کی گئی ہے اس تک پہنچنے کے لیے ریمانڈ درکار ہے، ہم نے ملزمان سے بارود اور دھماکا خیز مواد برآمد کرنا ہے

عدالت نے مزید جسمانی ریمانڈ کی استدعا مسترد کرتے ہوئے بانی پی ٹی آئی کی بہنوں علیمہ خان عظمیٰ خان کو جوڈیشل ریمانڈ پر جیل بھیج دیا۔