کابینہ کمیٹی کی سرمایہ کاروں کو راغب کرنے کیلئے ایکسپورٹ پالیسی میں نرمی کی تجویز

اسلام آباد (آئی پاک ٹی وی ) گوادر فری زون کیلئے غیر یقینی پالیسی نے سرمایہ کاری کے ماحول کو خراب کر دیا ہے، چینی سرمایہ کاری کے منصوبوں پر کابینہ کمیٹی (CCOCIP) درآمدی اور برآمدی پالیسی آرڈر سے استثنیٰ حاصل کرنے کی کوشش کر رہی ہے تاکہ سرمایہ کاروں کو بیرون ملک منڈیوں میں ترسیل کرنے میں سہولت فراہم کی جا سکے۔
ذرائع کےمطابق ایک سرمایہ کار نے گوادر فری زون میں کھاد کا پلانٹ لگایا لیکن پابندی کے باعث وہ اس کی مصنوعات برآمد کرنے سے قاصر رہا۔ کابینہ کے ادارے، جس نے یہ معاملہ ایک حالیہ اجلاس میں اٹھایا، کو اس سرمایہ کار کے بارے میں بتایا گیا جس نے گوادر فری زون میں پوٹاشیم سلفیٹ کھاد کا پلانٹ قائم کیا تھا لیکن ایکسپورٹ پالیسی آرڈر 2022 کے تحت کھاد کی برآمدات پر پابندی کی وجہ سے وہ اپنی حتمی پیداوار برآمد نہیں کر سکا۔
ایکسپورٹ پر مبنی صنعتی علاقے کے طور پر آزاد زون کی کشش کو بڑھانے کے لیے کابینہ کمیٹی نے تجویز دی کہ امپورٹ/ایکسپورٹ پالیسی آرڈر کی بعض شقوں سے استثنیٰ ہونا چاہیے۔
اس بات پر روشنی ڈالی گئی کہ فری زون کے قوانین کو علاقائی فری زونز جیسے متحدہ عرب امارات (یو اے ای)، ایران اور عمان کے قوانین کے مطابق ہونا چاہیے۔
بحث کے دوران کابینہ کمیٹی نے فری زون کی تعریف اور ایکسپورٹ پروموشن زون اور ایکسپورٹ پروسیسنگ زون سے اس کے فرق کے بارے میں دریافت کیا۔ تاہم، کوئی واضح تعریف یا متعلقہ مراعات دستیاب نہیں تھیں۔