اسلام آباد (پاک ترک نیوز) پیرس اولمپکس میں پاکستان کیلئے 40 سال بعد گولڈ میڈل حاصل کرنیوالے قوم ایتھلیٹ ارشد ندیم کو قومی ٹیسٹ ٹیم کے ہیڈکوچ جیسن گلیسپی نے ڈریسنگ روم میں مدعو کرلیا۔
ہیڈ کوچ جیسن گلیسپی نے جیولین تھرو اسپیشلسٹ ارشد ندیم کو کامیابی پر مبارکباد پیش کرتے ہوئے پاکستان کرکٹ ٹیم کے ڈریسنگ روم کے دورے کی دعوت دی۔
ان کا کہنا تھا کہ ہم ارشد ندیم کو ڈریسنگ روم میں مدعو کرنا پسند کریں گے، میں نے اولمپکس کے دوران تمام کھلاڑیوں کو ان کی حوصلہ افزائی کرتے دیکھا۔ان کا دورہ کرنا اور ٹیم کے ساتھ اپنا گولڈ میڈل شیئر کرنا شاندار لمحہ ہوگا۔
قومی ٹیسٹ ٹیم کے کپتان شان مسعود نے کہا کہ ارشد ندیم نے ہم سب کو جذباتی کر دیا ہے، وہ اس تمام پہچان کے مستحق ہیں جو انہیں مل رہی ہے وہ ہمارے قومی ہیرو کا درجہ رکھتے ہیں، انکی کامیابی پاکستان میں ٹیلنٹ کو ظاہر کرتی ہے۔
جیولین تھرو اسپیشلسٹ ارشد ندیم کا وطن واپسی پر شاندار استقبال کیا گیا جبکہ وزیراعظم سمیت اعلیٰ شخصیات نے اولمپئین کو مبارکباد اور انعامی رقم پیش کیں۔