اسلام آباد(آئی پاک ٹی وی ) وزیر خزانہ محمد اورنگزیب نے کہا ہے کہ ملکی معیشت بہتری کی جانب گامزن ہے، مہنگائی مسلسل کم ہو رہی ہے۔
وفاقی وزی خزانہ محمد اورنگزیب کا اسلام آباد میں پاکستان اکنامک ڈیش بورڈ کی افتتاحی تقریب سے خطاب کرتے ہوئے کہنا تھا کہ ملک میں ٹیکس فائلرز کی تعداد میں اضافہ ہوا ہے، ٹیکس ٹو جی ڈی پی میں اضافہ کرنا ہے، پائیدار معاشی استحکام کیلئے بنیادی اصلاحات لانا ہوں گی۔
وزیر خزانہ نے کہا کہ بینکنگ سیکٹر سرمایہ کاروں کو سہولت فراہم کر رہا ہے، وزیراعظم کا حکم ہے کہ حکومت صرف پالیسی فریم ورک دے گی۔
محمد اورنگزیب کا مزید کہنا تھا کہ ہماری معیشت بہتری کی جانب گامزن ہے، مہنگائی کی شرح مسلسل کم ہو رہی ہے، ہمیں اکنامک سروے کی بھی ضرورت ہے، پرائیویٹ سیکٹر کو معیشت کو لیڈ کرنا ہوگا۔
یاد رہے کہ گزشتہ روز میڈیا سے گفتگو کرتے ہوئے وزیر خزانہ محمد اورنگزیب نے کہا تھا کہ ملک میں کوئی منی بجٹ نہیں آئے گا، ہمارا روپیہ مستحکم ہو گیا ہے، آئی ایم ایف کے پروگرام سے ملک میں معاشی استحکام کو برقرار رکھنے میں مدد ملے گی۔