اسلام آباد ،راولپنڈی اور لاہور سمیت گرج چمک کے ساتھ بارش، نشیبی علاقے زیر آب

اسلام آباد(آئی پاک ٹی وی ) ملک کے مختلف شہروں میں موسلادھار بارش کا سلسلہ جاری ہے، جڑواں شہروں اسلام آباد ،راولپنڈی اور لاہور سمیت متعدد شہروں میں طوفانی بارش سے نشیبی علاقے پانی سے بھر گئے۔
تفصیلات کے مطابق راولپنڈی، اسلام آباد میں رات گئے سے وقفے وقفے سے بارش کا سلسلہ جاری ہے جس سے موسم خوشگوار ہوگیا۔
جڑواں شہروں اور مضافات میں موسلادھار بارش سے بعض مقامات پر سڑکیں اور گلیاں تالاب کی شکل اختیار کر گئیں جس کے باعث شہریوں کو روز مرہ کے معمولات اور آمدورفت میں شدید پریشانی کا سامنا کرنا پڑا جبکہ مختلف علاقوں میں بجلی کا نظام بھی متاثر ہوا۔
دوسری جانب لاہور سمیت ،کالاباغ، اٹک، جہلم، گجرات، خان پور، نارووال، خوشاب، دینہ، کندیاں اور چشمہ کے اطراف میں بھی تیز بارش ہوئی جس سے گرمی اور حبس میں واضح کمی آئی ہے، آزاد کشمیر کے مختلف علاقوں میں بھی بادل برس پڑے۔
خیبر پختونخوا، شمال مشرقی اور وسطی پنجاب، خطہ پوٹھوہار، اسلام آباد، کشمیر اور گلگت بلتستان میں آندھی و جھکڑ چلنے اور گرج چمک کے ساتھ بارش کا امکان ہے۔