امیتابھ بچن اور خانز کو پیچھے چھوڑ کر پہلی بار100کروڑ کا بزنس کرنے والا سپر سٹار کون ؟

ممبئی(آئی پاک ٹی وی ) بالی ووڈ میں امیتابھ بچن اور عامر خان ،سلمان خان اورشاہ رخ کو پیچھے چھوڑ کرپہلی بار 100کروڑ کا بزنس کرنے والی فلم کا سپر سٹار کون ہے ؟ شائقین نام سن کر حیر ت میں مبتلا ہوگئے ۔
فلم انڈسٹری میں ہٹ فلم کا اندازہ اُس کی کاسٹ یا کہانی سے نہیں لگایا جاتا بلکہ اس کا اندازہ اُس کی باکس آفس پر کمائی سے لگایا جاتا ہے، جو فلم جتنی زیادہ کمائی کرتی ہے، وہ اتنی ہی زیادہ ہٹ فلم مانی جاتی ہے۔
ماضی میں اگر کوئی فلم 100 کروڑ روپے کا بزنس کرلیتی تھی تو اُسے ہی ہٹ فلم کا ٹائٹل دیا جاتا تھا لیکن موجودہ دور میں ایسا بالکل نہیں ہے۔
موجودہ دور میں اگر کوئی فلم 500 کروڑ کا بزنس بھی کرلیتی ہے تو یہ کوئی بڑی بات نہیں مانی جاتی جبکہ آج کل کسی بھی فلم کے لیے 100 کروڑ کرنا تو عام سی بات ہے۔
مختلف میڈیا رپورٹس کے مطابق 90 کی دہائی میں سلمان خان کی فلم ‘ہم آپ کے ہیں کون؟’ نے سب زیادہ کمائی کی تھی اور اسی فلم نے 100 کروڑ کا بزنس کرنے والی پہلی بالی ووڈ فلم کا اعزاز بھی اپنے نام کیا تھا لیکن یہ دعوے جھوٹے ہیں۔
بالی ووڈ کو پہلی 100 کروڑ والی ہٹ فلم دینے والے اداکار نہ سلمان خان، نہ شاہ رخ خان، نہ عامر خان اور نہ ہی امیتابھ بچن ہیں بلکہ یہ تاریخی کارنامہ 80 کی دہائی میں لیجنڈری اداکار متھن چکرورتی نے سر انجام دیا تھا۔
متھن چکرورتی کی سال 1982 میں ریلیز ہونے والی فلم ‘ڈسکو ڈانسر’ بالی ووڈ کی پہلی فلم تھی جس نے مجموعی طور پر 100 کروڑ روبے کا بزنس کیا تھا۔
فلم ‘ڈسکو ڈانسر’ نے ابتدائی ریلیز میں 6 کروڑ کا بزنس کیا تھا لیکن جب اس فلم کو سوویت یونین میں 1984 کو دوبارہ ریلیز کیا گیا تھا تو وہاں اس فلم نے تقریباً 95 کروڑ روپے کا بزنس کیا تھا۔
اس کمائی کے بعد فلم ‘ڈسکو ڈانسر’ نے بھارت سمیت پوری دُنیا سے مجموعی طور پر 100 کروڑ روپے سے زائد کما لیے تھے۔