لاہور(آئی پاک ٹی وی ) پاکستان تحریک انصاف (پی ٹی آئی ) آج لاہور میں عوامی طاقت کا مظاہرہ کرے گی۔
ضلعی انتظامیہ کی جانب سے تحریک انصاف کو کاہنہ مویشی منڈی میں جلسے کی مشروط اجازت دے دی گئی، ڈپٹی کمشنر نے جلسے کی اجازت کا نوٹیفکیشن جاری کردیا ہے۔
ذرائع کے مطابق اجازت ملنے کے بعد جلسہ گاہ میں پی ٹی آئی کی جانب سے تیاریاں شروع کردی گئیں،سٹیج لگنے اور جلسے کا میدان سجانے کا عمل جاری ہے، کرسیاں، قناتیں اور سٹیج کا سامان جلسہ گاہ میں لگنا شروع ہو گیا، مرکزی سٹیج کیلئے کنٹینر بھی جلسہ گاہ پہنچا دیا گیا۔
جلسہ گاہ کے اطراف میں انٹرنیٹ سگنل کو سست کردیا گیا ہے، جلسہ گاہ پر عوام ویڈیوز اور آڈیوز ڈاؤن لوڈ کرنے سے محروم ہیں۔
مقامی کارکنان نے بھی جلسہ گاہ کا رخ کر لیا، کارکنان پارٹی بینرز اور پوسٹرز اٹھائے جلسہ گاہ میں داخل ہونا شروع ہو گئے ہیں جبکہ جلسے میں شرکت کے لیے ملک کے مختلف شہروں سے بھی قافلے رواں دواں ہیں۔
پی ٹی آئی کے جلسے کے پیش نظر اسلام آباد لاہور موٹروے کو مکمل طور پر بند کر دیا گیا ہے جس کے باعث شہریوں کو مشکلات کا سامنا کرنا پڑ رہا ہے، لاہور موٹروے ٹول پلازہ پر گاڑیوں کی میلوں لمبی قطاریں لگ گئیں، یوٹرن نہ ہونے کے باعث راوی روڈ سے گاڑیاں واپس موڑی جا رہی ہیں، خیبرپختونخوا سے آنے والے قافلوں کے لیے لاہور کے راستے مکمل طور پر بند ہیں۔جہلم میں جی ٹی روڈ پر ٹول پلازہ کے قریب پولیس تعینات کر دی گئی، پی ٹی آئی کارکنان کی متوقع گرفتاری کےلیے پولیس تعینات کی گئی ہے۔
اٹک چھچھ انٹر چینج اور اٹک پل سے پولیس نے رکاٹیں ہٹا دیں، سڑک کے دونوں اطراف ٹریفک رواں دواں ہے، قبل ازیں لاہور جلسے میں آنے والے قافلوں کو روکنے کیلئے روڈ کے اطراف پر رکاٹیں لگائی گئی تھیں۔