عامر خان کی فلم ستارے زمین پر 20 دسمبر 2024 کو ریلیز ہوگی

نئی دہلی (آئی پاک ٹی وی ) بھارتی سپر سٹار عامر خان کی فلم ستارے زمین پر 20 دسمبر 2024 کو ریلیز ہوگی،بالی وڈ اداکار نے مستقبل میں ریلیز ہونے والی اپنی فلموں کے ڈیجیٹل رائٹس سے متعلق اہم فیصلہ کر لیا۔

مسٹر پرفیکشنسٹ عامرخان فلم انڈسٹری کے کاروبار سے متعلق ایک اہم تبدیلی کی منصوبہ بندی کر رہے ہیں، عامر خان اپنی مستقبل کی فلموں کے ڈیجیٹل رائٹس فروخت نہ کرنے پر غور کر رہے ہیں جس کا مقصد تھیٹر میں ریلیز کو ترجیح دینا ہے۔
عامر خان کا وژن ہے کہ وہ 12 یا اس سے زائد ہفتوں کے لئے اپنی فلموں کو سینما گھروں کے لئے مخصوص رکھیں۔ڈیجیٹل رائٹس کی فروخت میں تاخیر کا مقصد فلم کو تھیٹر میں زیادہ سے زیادہ چلا کر دیکھنے والوں کی پذیرائی کا اندازہ لگانا ہے۔
لیکن اب تک یہ واضح نہیں ہو سکا کہ عامر خان اس منصوبہ بندی کے تحت ہی اپنی آئندہ آنے والی فلم ’ستارے زمین پر‘ ریلیز کریں گے یا نہیں، فلم 20 دسمبر 2024 کو ریلیز ہونے والی ہے۔