راولپنڈی(آئی پاک ٹی وی) سابق وزیراعظم اور پاکستان تحریک انصاف کے بانی عمران خان نے نیب ترامیم کے بعد 190 ملین پاؤنڈز ریفرنس میں رعایت مانگ لی۔
تفصیلات کےمطابق اڈیالہ جیل میں 190 ملین پاؤنڈز ریفرنس کی سماعت ہوئی، احتساب عدالت کے جج ناصر جاوید رانا نے کیس کی سماعت کی،دوران سماعت بانی پی ٹی آئی عمران خان نے 190ملین پاونڈریفرنس میں بریت کی درخواست دائر کردی۔
بانی پی ٹی آئی عمران خان کے وکیل نے مؤقف اپنایا کہ نیب ترامیم سے متعلق فیصلے کے بعد 190ملین پاونڈز کا کیس بنتا ہی نہیں، نیب ترامیم میں کابینہ کے تمام فیصلوں کو تحفظ حاصل ہے، سوال یہ ہے کہ نیب ترامیم کے بعد احتساب عدالت کا اس کیس میں دائرہ اختیار بنتا ہے یا نہیں۔
نیب پراسیکیوٹر نے کہا کہ اگر احتساب عدالت کا اس کیس میں دائرہ اختیار ہے تو پھر بریت کی درخواست سنی جاسکتی ہے۔
عمران خان کے وکیل نے کہا کہ ہم نے عدالت کے دائرہ اختیار کو چیلنج ہی نہیں کیا، عدالت کے دائرہ اختیار کا فیصلہ کرنا عدالت کی صوابدید ہے۔
احتساب عدالت نے 190ملین پاونڈز ریفرنس کی سماعت میں ڈیڑھ گھنٹے کا وقفہ کیا جس کے بعدعدالت نے فریقین کو نوٹس جاری کرتے ہوئے عمران خان کی درخواست بریت پر سماعت 10ستمبر تک ملتوی کردی۔