لاس ویگاس(آئی پاک ٹی وی ) امریکہ کے صدارتی الیکشن میں ریپبلکن کے امیدوار اور سابق صدر ڈونلڈ ٹرمپ کا کہنا ہے کہصدر بننے کے بعد اُن یونیورسٹیز کے فنڈز کم کردوں گا جنھوں نے اسرائیل اور یہود مخالف مواد پھیلانے میں کردار ادا کیا تھا اور فلسطینی مظاہرے نہیں روکے۔
ٹرمپ نے یہودی عطیہ دہندگان سے کہا کہ اگر وہ منتخب ہوگئے تو اُن امریکی یونیورسٹیوں کے خلاف کارروائی کریں گے جو “یہود مخالف مواد” پروپیگنڈا مہم کا حصہ تھیں۔
سابق صدر ڈونلڈ ٹرمپ نے انتخابی ریلی سے خطاب میں غزہ مظاہروں کی اجازت دینے والی جامعات پر تنقید کرتے ہوئے مزید کہا کہ غلط طور پر اسرائیل کی مخالفت کرنا یہود دشمنی ہے۔
امریکی صدر نے خبردار کیا کہ اگر یہ جامعات اس قسم کے پروپیگنڈے کو فروغ دینے میں ناکام رہیں تو انھیں ایکریڈیشن اور وفاقی فنڈنگ سے محروم کردیں گے۔
ٹرمپ نے یہ بھی اعلان کیا کہ وہ غزہ سے امریکا میں پناہ گزینوں کی آمد اور آبادکاری پر پابندی عائد کریں گے اور حماس کے حامی مظاہروں میں ملوث افراد کو گرفتار کریں گے۔
واضح رہے کہ امریکا کی متعدد جامعات اور کالجز میں غزہ پر وحشیانہ بمباری کے خلاف مظاہرے کیے گئے تھے۔ طلبا نے غزہ میں اسرائیل کی فوجی کارروائیوں کی مخالفت کی اور یونیورسٹیوں پر زور دیا کہ وہ اسرائیل کی حمایت کرنے والی کمپنیوں سے تعلقات منقطع کریں۔